Најбавниот воз во Европа- во Швајцарија
Патувањето со воз во Европа забрзано се враќа во мода, особено откако на Стариот континент се намножија линиите со новите експрес брзи возови.
Освен тоа, се менуваат законските и даночни одредби во некои земји ( Франција , на пример) со кои одново се фаворизира железницата, наместо авионскиот превоз, посебно на кратки реалции, до градови до кои има и железничка и авионска врска. Таквите мерки, како и настојувањето да се поевтинат железничките карти , придонесуваат да се зголеми бројот на патниците и интересот за патување со воз..
Швајцарија , како една од економски најмоќните европски држави, можеби нема експресни линии , како оние во Франција , или Германија, но оваа алпска земја немала и нема проблем со недостиг на патници- посебно странски туристи и гости кои ги има во текот на целата година. А, швајцарските возови се популарни, не поради својата брзина, туку затоа што најчесто минуваат низ прекрасни пејсажи.
Во Швајцарија, затоа, е регистриран и најбавниот воз во Европа.
Познат е како „Glacier Express” – или како алпскиот воз- чија просечна брзина изнесува само 36 км/на час. Возот ги поврзува Цермат и Сент Мориц и е најбавен на континентот, но е означен и како најатрактивен , па возењето со него се смета за авантура која треба да се доживее.
На својата делница овој Експрес минува преку 291 мостови, низ 91 тунели и се искачува на надморска височина од 2044 метри , на преминот Обералп. И тоа го прави и во текот на зимата, кога има многу снег.
За оваа железничка линија велат дека е вистинско инжинерско чудо и достигнување, изградена во едно друго, дамнешно време , на ваков терен, пробивајќи се низ швајцарските Алпи. Во денешно време линијата повеќе се смета како една од атракциите на Швајцарија. Никому не пречи што возот , на определени делници , се движи дури и со брзина помала од 20 км/час.
